नगरपरिषद शाळा क्रमांक २ मधील विद्यार्थ्यांचे पारंपारिक नृत्य लक्षवेधी

तुळजापूर (दि.१९) प्रतिनिधी डॉ सतीश महामुनी

नगरपरिषद प्राथमिक शाळा क्रमांक २ येथे छत्रपती शिवाजी महाराज यांची जयंती मोठ्या उत्साहात साजरी करण्यात आली. छत्रपती शिवाजी महाराजांच्या पुतळ्याचे पूजन न.प. शालेय शिक्षण विभाग सभापती सौ. नीता दिनेश क्षिरसागर यांच्या हस्ते करण्यात आले.

प्रभारी नगराध्यक्ष रामचंद्र रोचकरी यांच्या उपस्थितीत या प्रशालेच्या विद्यार्थ्यांनी छत्रपती शिवाजी महाराज चौकामध्ये पारंपारिक वेशभूषा मध्ये केलेले नृत्य लक्षवेधी ठरले. उपस्थित नागरिकांनी टाळ्याच्या कडकडाटामध्ये विद्यार्थ्यांचे कौतुक केले.

 यावेळी विद्यार्थ्यांनी छत्रपती शिवाजी महाराज, राष्ट्रमाता जिजाऊ, मावळे इत्यादी वेशभूषा परिधान केली होती तसेच छत्रपती शिवाजी महाराजांच्या जीवनावर अनेक गीतांवर नृत्य सादर करून उपस्थितांचे मन जिंकले.  छत्रपती शिवाजी महाराज यांच्या जीवनावर विद्यार्थ्यांनी भाषणे केली. प्रास्ताविक मुख्याध्यापक गणेश रोचकरी यांनी केले. नगराध्यक्ष रामचंद्र रोचकरी आणि इतर नगरसेवक भारतीय जनता पार्टीचे पदाधिकारी कार्यकर्ते यांनी नगरपरिषद शाळा क्रमांक दोन मधील विद्यार्थ्यांच्या या पारंपरिक नृत्य सादरीकरणाचे टाळ्यांच्या जयघोष मध्ये कौतुक केले. जय भवानी आणि जय शिवाजी जय घोषामध्ये सारा परिसर शिवमय झाला होता.

    यावेळी बाळासाहेब जेटीथोर, महेंद्र पाटील, महेंद्र कावरे, सुरजमल शेटे  सुज्ञानी  गिराम, किरण लोहारे ,विद्यादेवी स्वामी, शिवा डाके पालक विद्यार्थी मोठ्या संख्येने उपस्थित होते.

प्रतिक्रिया

नगरपरिषदेच्या मराठवाड्यातील प्रशालेमध्ये तुळजापूर येथील शाळा क्रमांक एक व शाळा क्रमांक दोन व तीन या अत्यंत दर्जेदार शिक्षण देणाऱ्या शाळा आहेत. विद्यार्थ्यांच्या कलागुणांना वाव देण्याच्या अनुषंगाने येथील सर्व शिक्षक कष्टाने विविध कला गुणदर्शनामध्ये परिश्रम घेतात त्याचे दर्शन छत्रपती शिवाजी महाराज जयंती निमित्ताने दिसून आले आहे. सर्व शिक्षक आणि विद्यार्थ्यांचे आम्ही मनापासून अभिनंदन करीत आहोत.

– विशाल रोचकरी, माजी नगरसेवक नगरपरिषद तुळजापूर